喺西區扮完工，離開時我看了一吓手錶，時間尚早，不如去看海。無目的放空，任由可納百川嘅大海沖走悶熱同鬱結，簡直係香港人久違嘅奢侈。
慢慢行落石山街嘅長樓梯，我忍唔住伸手撫摸涼浸浸嘅石牆，想像現代發展都無法磨滅嘅歷史痕跡，完全沉醉喺呢份港式典雅。到石級底再往上望，又係另一幅罕有景象。我差啲以為自己穿越咗去邊一國嘅藝術村，畢竟香港好少可會有完美融合街景同社區參與嘅設計，喺凹凸不平嘅表面繪上散發童心嘅繽紛色彩，映襯住後面嘅老舊街燈同小拱門，真可愛，總會令人隨之會心一笑，尤其是早就遺忘點樣欣賞身邊事物嘅大人。
一直向外行，就到打卡勝地嘅-海旁。堅尼地城嘅海係獨特嘅，明明沿住東區走廊都見到維港係帶點灰綠，但一到西區就會突然間變成深邃嘅藍，係只會屬於海洋嘅自然冷色。有陽光嗰陣，海面就會一閃一閃，好似小星星咁，低調而耀眼，好想撈起觸碰吓再據為己有。加上一望無際嘅海平線，間中有幾艘船徐徐駛過，海鷗白鴿緩緩飛過，微風又輕輕吹過，我彷如置身一片與世隔絕嘅淨土，恬靜淡然，遠離俗世嘅煩囂。可能你覺得我吹大咗，但我真係好羨慕本區居民，生活喺得天獨厚嘅小區，一落樓行幾步就可以飽覽如畫般嘅壯麗景色，午後無事無幹就可以出嚟曬下太陽，釣吓魚過吓癮，發吓呆攤唞吓，簡單嘅日常原來都可以咁幸福。
但係我仍然唔滿足，抬頭見是日天朗氣清，於是決定搏一鋪，再一路向西，行到唞晒 大氣，大汗疊細汗，都要去最出名嘅泳棚睇日落。
「呀妹，呢邊呀。」可能見我烚吓烚吓咁搵緊路，著住白背心直間褲嘅做緊體操嘅呀叔大叫。我目測佢已過花甲之年，但老當益壯，聲如洪鐘，一身性感嘅古銅膚色，仲有住後生仔最羨慕嘅大隻佬身形，一舊贅肉都搵唔到，似乎係每日游水鍛鍊有功。
「你又知我要去邊嘅？」我挑機問。
呀叔嘴角一歪恥笑：「挑，咪玩啦，呀叔喺西環打躉咗幾廿年，喺到游水女個陣你都未喺呀媽個肚到啦。行快兩步啦呀妹，而家天色最靚呀喂。」
我笑住用手握拳，以示晚輩失敬，就三步拼兩步咁跑到岸邊。好彩唔算人逼人，但三百幾度無敵大海景嘅打卡位依然大排長龍，咁又係嘅，最柔和嘅自然女神光，配埋身後呢片金光閃閃嘅橙海簡直無得輸，呃到上百個讚。我一個毒撚就咪搞呢啲野啦，盞笑大人個口，更何況以我觀賞日落多年嘅經驗，今日嘅畫面將會十分高質，我實在連一秒都唔想分心而錯過。喺呢個變幻無窮嘅神奇時分，海面正中央開始出現一道映照而成嘅光芒，隨住懸日漸沉而改變位置同深淺，喺條告別白晝嘅道路。太陽逐漸由刺眼嘅火球化身成一個深橙嘅完整鹹蛋黃，呢個係全日唯一可以直視太陽嘅珍貴時刻，更加可能係轉瞬即逝，隨時比飄過嘅雲霞遮蓋，所以難得黎到香港數一數二嘅觀賞處，一定要金睛火眼望實。我自動過濾哂不相干嘅人，眼中只有樹枝間透落嘅重重光影，有如置身喺唯美電影中。
一個人都可以盡興，我比呢個隱世秘境嘅美感動到如痴如醉之際，《堅尼地半日遊》前面有個鬼佬已經校好哂角度，揸支大炮影晒相，得閒無事就過黎搭訕。佢浸過幾年，一口流利中文，仲話自己專登上網睇晒遊記，做足功課先識嚟呢到，真識貨。佢問我可唔可以帶佢去玩，一講完，太陽就一息間沉下去，無影無蹤，剩下餘暉。
我內心惋惜，嘆咗口氣。
「好呀，我地去石牆樹行吓？」唔知入夜後嘅西環，會唔會浪漫得更不真實？