Header Image

有人認為幸福嘅家庭喺風光如畫嘅半山,亦有人認為幸福嘅家庭喺傳統豪宅區淺水灣。好多人選擇努力工作,希望自己嘅收入更上一層樓,搬入心中嘅區域居住,因此唔少人匆匆忙忙生活,忘記欣賞當下嘅風景。

 

從前我嘅目標想搬入背山面海嘅屋企,以為住喺自己喜歡嘅地方就係幸福,於是做一個營營役役嘅打工仔。後來歷盡千帆,人生閱歷打開新嘅一頁,我終於領悟到幸福嘅家庭唔在乎有幾寬闊,唔在乎有幾豪華,亦唔在乎喺邊一個區域,幸福嘅家庭係互助互愛。

 

我童年住喺灣仔,雖然係陋室,但幸福美滿。後來搬入摩星嶺,摩星嶺冇灣仔咁方便,亦都冇灣仔咁熱鬧。由摩星嶺走下山,幾乎要半個小時,外出要攀山越嶺。由於冇地鐵,從堅尼地城坐巴士去銅鑼灣需要一個小時,經常塞車。外出一趟,筋疲力盡。我細個嘅時候唔鍾意摩星嶺,一講到西環,怨聲載道,我覺得住喺西環唔幸福。長大以後,我甚至將行李背起來,又搬回灣仔。

 

有一次我聽經說法,法師說:「香港人喜歡埋怨,即使連塞車呢啲小事都會自怨自艾。我哋解唔去欣賞美好嘅事物?正如香港有好多美麗嘅沙灘,良辰美景多不勝數。」我茅塞頓開,我想起西環嘅屋企每日早晨和黃昏聽到雀仔唱歌,窗外有藍天白雲,有茁壯成長嘅樹木。眺望山腳,看見維多利亞港,綠水青山盡在眼前。返到屋企吃到媽媽煮嘅飯,可以飲一碗老火湯,雖然粗茶淡飯,但係親情喺一飯一湯之間發揮到淋漓盡致。人生或者就係咁細膩,唔係要求家財萬貫,亦都唔係要求華衣美食,而係在乎一飯一湯。抽絲剝繭,底子裡其實係濃濃嘅親情令我窩心,令我覺得呢個係幸福嘅家庭。豪宅不過係一個軀殼,如果家嘈屋閉,又點會係幸福嘅家庭。

 

我喺西環度過近二十載,花開花落,有喜有悲,點點滴滴匯聚成精彩嘅人生。回顧往昔,我同西環有一段距離,就好似我好努力去愛一個人,但難以愛上對方。後來繁花看盡,我發現西環並非一無是處。中西美食喺西環發揚光大,有粵菜、上海菜、韓國菜和泰國菜等等,不同派別異彩紛呈,煙火生活令人覺得喜慶、燦爛,帶來嘅快樂雖然淺薄,但足以令人念念不忘。

 

西環係一個清幽嘅地方,好多古舊嘅大廈經過光陰洗禮,露出曖昧嘅色調,映襯著前人舊夢嘅浮光掠影。經過古老嘅大廈,聞到海味散發出海水嘅氣味。我漫不經心亂轉,呢種慢生活令人輕鬆自在。其實好嘅光陰應該用來細緻品嚐生活,而唔係馬不停蹄地工作。

 

如今西環已經有地鐵,交通四通八達,但我仍然難以愛上西環,或者西環唔適合做情人,只適合做朋友,就像大家一起成長,經歷風風雨雨,仍然不離不棄,互相欣賞。或者細水長流嘅友情才經得起考驗,以後我會用更多時間陪伴西環,希望大家在四季中共勉。