Header Image

每一區嘅街坊都有一啲共同秘密(Well-known secret),佢哋唔會隨便同人講嘅食店、咖啡室,或者係坐吓傾計嘅地方。本來西環碼頭就係咁嘅地方,同街坊講開「出去坐吓」嘅「出去」,就係講緊仲未有乜嘢海濱長廊,仲未有圍欄,叉錯腳就會碌落海嘅西區貨物起卸區。只係唔知幾時開始,呢個秘景竟然有個新名,叫Instagram pier。一眾街坊都R哂頭,攪咩呀?星期六日出面好似行花市咁多人,我點放狗、跑步、釣魚呀?有啲地方係要一班街坊用默契守護嘅,即係區外人問你,西環有咩好地方,你一定唔會講,因為你覺得作為街坊,你有責任好好守護佢。如果西環街坊帶你去啲你平時喺乜假期冇睇過,甚至佢都冇講過嘅地方,佢一定好信任你,知道你唔會帶一大群人嚟破壞佢嘅美好。以下我想講嘅共同秘密,已經唔存在㗎啦,但係佢永遠係我哋石塘咀三寶麵嘅其中一寶。

 

石塘咀麵食有三巨頭,嘉安街祥興、火井翁記,同水街金祥。可惜嘅係,祥興因為收樓改建「豪宅」十幾年前就收咗,火井翁記就因老闆娘走咗冇再做,得返2019年先知係金色嘅金祥排骨麵。

 

區內共同秘密有趣嘅地方係大家有個約定俗成,就好似我哋屋企食飯之前,總會有人話「唔係好餓,頭先食咗少少嘢」,當中嘅「少少嘢」必然係翁記。打邊爐嘅時候有人神神祕祕拎啲辣醬出嚟,佢必然係翁記唔獨立發售嘅自家製辣醬。翁記最特別嘅地方係,你唔會介紹俾其他人。嗰度冇冷氣好熱啦、坐得唔舒服啦、啲筷子插哂落筒水到好核突啦,千千萬萬個理由去彈佢,但係就係有時會掛住佢啲燶燶哋嘅蔥油、唔辣但好香嘅辣醬、好細粒但多汁嘅牛丸。翁記唔係啲超級美食,嗰碗大腸粉腸牛丸米硬係會成日喺你有啲餓又未夠鐘食飯嘅時候,喺你個心肝仔到撩撩吓。如果你唔係好信任個朋友,你唔會帶佢去翁記食麵,你驚,唔係因為翁記唔夠大體,係驚個新朋友話「其實唔係咁好味」。

 

翁記喺石塘咀陪伴街坊成長,我媽媽當年拍拖又係去食翁記,我拍拖又係去翁記。嗰兜辣椒醬記載住幾多變遷,記載住幾多個故事?嗰陣每次拍拖我都會帶對方去食翁記,唔單只係想試吓佢冇冷氣食唔食得慣,而且仲係分享回憶嘅一個方法。想帶對方了解自己由細食到大嘅麵館係點,仲想俾對方親身體驗。細細個好怕辣,見爸爸媽媽用一隻湯羹載住辣醬,夾住粒白魚蛋起勢點,粒白魚蛋都變成紅色先收手,放入個口到好滿足咁咀嚼,嗰一刻我唔明,點解大人要食呢啲嘢,仲要猛話好香。到大個少少開始鍾意食辣,又嫌佢唔夠辣,起勢落,落完又覺得好咸。呢隻辣醬係咸味為主,辣味為次嘅辣醬,充滿辣椒香,配以細細粒但好多汁嘅牛丸,的確係一種別樹一格嘅美味。唔係驚天動地嘅味道,但絕對會縈繞於心。

或者人係咁,成日會掛住啲已經過咗去嘅美好,講起波記就會講返以前仲喺山道嘅波記燒鵝瀨、講起金祥又會講喺均益嗰陣好食啲,或者海南嘅聖誕大餐、祥興嘅魚皮餃、森記嘅十蚊西米露⋯⋯的確我都好掛住以前嘅石塘咀,但我都好鍾意而家嘅石塘咀。我鍾意立場明確嘅金祥,2019年之後消費多咗一種意義,金多寶麵嘅味道,同一班同行兒女一齊食飯嘅溫暖都一樣值得記住。或者食嘢都係同一個地方共建回憶嘅一種方法,今日發生嘅事會變成第時嘅「想當年」,而我哋喺回憶舊時嘅同時,都應該好好珍惜同身邊人一齊食金祥嘅每一秒,因為呢啲都會成為我哋西環街坊嘅共同回憶,而呢啲開心嘅片段就係支撐我哋捱過黎明嚟之前嘅黑暗。隨著我哋嘅共同秘密愈嚟愈多人知,守護呢啲秘密嘅人唔再只限於西環街坊,仲有真係好鍾意香港嘅香港人。