Header Image

要講中西區,一個由細到大三十幾年都住響尼區嘅人,究竟會諗起啲咩?

 

第一樣喺我腦入面出現嘅,喺公園,動植物公園。又或者咁講,可能我同動植物公園有一份特別嘅緣份,係一個無形嘅連結令我第一樣就會諗起佢。

 

記得細個果時去公園,你會覺得呢個公園好鬼大,入面又咩都有,遊樂場、噴水池、仲有果條嗌完會有回音嘅隧道,不過果時最鐘意都係公園有動物睇。公園除有唔同嘅馬騮同雀仔,去到就一定要去睇老虎。雖然果時人仔細細,但係企響個老虎籠前面就一啲都唔會覺得攰、覺得悶,就算佢匿埋唔出尼,都會企響個籠前面死等爛等,等到比阿媽拖住走。

 

去到讀書果時,逢親運動會要練跑,都係走去圍住噴水池個圈,有樹又有樓,似去睇景多過去跑;又或者考試耍太極,亦都會響旁邊搵個寧靜嘅角落,匿埋練唔似樣嘅招式。尼個時候,會抬頭望樹上面最好認嘅小葵花鳳頭鸚鵡,即係全身白色羽毛,頭頂有幾條黃毛果種,幻想佢會唔會練到身水身汗之後,飛落尼跟埋你返屋企。

 

之後出做野,估唔到同公園走得更近。響機緣巧合之下幫手帶過公園嘅導賞,果時先更加知道公園入面嘅一草一木、一磚一瓦。原來自己一直生活響咁有趣嘅古跡入面,一塊平凡嘅樹葉都可以有佢嘅得意之處,就連塊地磗都可以有佢自己嘅故仔。每一次都會有新發現,但無論點變,個陪住我一路成長嘅公園都係我響中西區嘅首選。

 

我嘅中西區憶記就響度喇,咁你呢?

比多個小玩意同大家分享,如果你有時間,可以去公園對面嘅明愛餐廳坐,一邊享用對面綠油油嘅樹林景,仲可以搵入面嘅野生松鼠,睇到都夠你開心一日啦。