黃衫小學生要P圖做白衫!香港郵政推出特區周年紀念郵票現明顯改圖

香港郵政今日(21日)公布香港回歸25周年紀念郵品,主題係「安定繁榮」,圖案分別係紀律部隊升旗、立法會開會、前海深港青年夢工場以及香港小學嘅升旗禮。不過,港語學發現當中嘅小學生校服顏色竟然由黃色修圖成白色,十分詭異。

港語學翻查政府資料,發現呢幅相片出自政府舊年「全民國家安全教育日」嘅新聞公告,圖中嘅學校實為處於灣仔嘅聖公會聖雅各小學,佢哋身穿嘅夏季運動校服,一如其他聖公會小學,都係使用比較活潑嘅黃色,因此亦都令香港小學生有「小學雞」之稱。當局都未有解釋點解會「改黃為白」。

對比郵票同原本相片,除咗小學生嘅黃色校服外,操場嘅籃球架、附近嘅高樓大廈、以及參加國旗禮嘅楊潤雄等一眾高官,都被P走或遮走。

喺廣東話文化嚟講,著晒白色衫其實好「唔老嚟」(唔吉利),因為白色通常都係同「白事」(喪事)有關,一排整齊站立嘅白衫人都會容易聯想到喪事,因此喺本地有關喜慶事嘅設計上都會避免使用。當局褪走照片入邊嘅小學生嘅「黃色」,唔知道係咪2019年社會運動有關係。

#教育局 #香港郵政 #香港郵局 #香港郵票 #港語學 #黃色衫 #佢家下黃色衫 #白色衫 #黃衫 #白衫 #白衣人 #升旗禮 #楊潤雄 #國家安全日 #回歸25周年 #廣東話 #港語學

0 0 votes
Article Rating